د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني او مل تخنیکي ټیم تورخم ته د سفر په ترڅ کې له روغتیایي مراکزو او خدماتو څخه نظارت ترسر کړ
په دغه نظارت کې چې د عامې روغتیا وزارت د معالجوي طب لوی رئیس، ډاکټر وحدت الکوزي، مل تخنیکي ټیم او ننګرهار عامې روغتیا رئیس مولوي امین الله شریف شتون درلود، په کې هېواد ته د بېرته راستنېدونکو کډوالو میشت غالي کې روغتیایي مرکزونه او تورخم بېړني روغتون بېلابېلې برخې له نژدې ولیدل شوې.
د روغتیایي خدمتونو وړاندې کولو مرستیال، ښاغلي مولوي عبدالولي حقاني روغتیایي کارکوونکو ته د خدماتو د لا ښه والي او پراخوالي په اړه لازمې سپارښتنې وکړې؛ ترڅو د بېرته راستنېدونکو هېوادوالو روغتیایي ستونزو ته پر وخت رسېدنه وشي.
د یادونې وړ ده چې د بېرته راستنېدونکو هیوادوالو لپاره تورخم کې ۹ روغتیایي مرکزونه او یو ۲۰ بستریز روغتون، چې ټول اړین خدمات پکې وړاندې کېږي، فعالیت کوي او د ناروغانو د انتقال لپاره شاوخوا ۱۵ امبولانسونه په مهمو برخو کې ځای پر ځای شوي دي.
