د ا.ا.ا. د عامې روغتیا وزیر، ښاغلي مولوي نور جلال جلالي د چین سفیر، ژاو شېنګ سره په دوه اړخیزو اړیکو او روغتیايي برخه کې پر دوامداره همکاریو ناسته ترسره کړه
د عامې روغتیا وزیر، ښاغلي مولوي نور جلال جلالي د افغانستان او چين ترمنځ دوامداره اړیکې اړینې وبللې او د یاد هېواد له سفیر څخه یې د کندهار میرویس سیمه ییز روغتون ودانۍ د بیا ترمیم، خدماتو پراختیا، سنتي طب او راډیولوژي برخو کې د افغان روغتیايي کارکوونکو د ظرفیت لوړونې او ساري ناروغیو پېښو ته د رسېدنې په موخه د وسایلو، درملو او واکسین برابرېدو برخو کې د لا زیاتو همکاریو غوښتنه وکړه.
بل لور د یاد هېواد سفیر د خپلو دوامداره همکاریو ژمنه بیا تازه او د میرویس سیمه ییز روغتون بیا رغونې، روغتیايي کارکوونکو ظرفیت لوړونې، سنتي طب او طبي وسایلو برخو کې د همکارۍ ډاډ څرګند کړ.
