د روغتیايي خدمتونو وړاندې کولو مرستیال د قطر هېواد سرې میاشتې د نړیوالو مرستو او سپارښتنو برخې له مسؤل سره وکتل
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني په خپل کاري دفتر کې د قطر هېواد سرې میاشتې د نړیوالو مرستو او سپارښتنو برخې له مسؤل، ښاغلي محمد صالح ابراهیم او مل پلاوي سره لیدنه ترسره کړه
په دې لیدنه کې د عامې روغتیا وزارت د روغتیايي خدمتونو وړاندې کولو مرستیال، د دواړو لورو ترمنځ د لا زیاتو همکاریو او همغږۍ اړوند خبرې ترسره کړې او د قطر هېواد د سرې میاشتې د نړیوالو مرستو او سپارښتنو برخې له مسؤل یې وغوښتل، چې د افغانستان روغتیايي سکتور سره په بېلا بېلو برخو کې همکاري وکړي.
همداراز د قطر هېواد د سرې میاشتې د نړیوالو مرستو او سپارښتنو برخې مسؤل د دوامداره همکارۍ ډاډ ورکړ او ویې ویل، نوموړې اداره ژمنه ده، چې د روغتیایي کارکوونکو روزنې، په نشه یې توکو د روږدو د درملنې او په لرې پرتو سیمو کې د نویو روغتیايي مرکزونو د جوړېدو برخه کې د افغانستان عامې روغتیا وزارت سره همکاري وکړي.
سربېره پر دې یاد پلاوي د عامې روغتیا وزارت د روغتیايي خدمتونو د وړاندې کولو مرستیال، ښاغلي مولوي عبدالولي حقاني په شتون کې د اندراګاندي ماشومانو درملنې روغتون له قلبي څانګې څخه لیدنه ترسره کړه او په دې برخه کې یې د عامې روغتیا وزارت رهبرۍ سره د همکارۍ ژمنه وکړه.
