د عامې روغتیا وزارت د روغتیايي خدمتونو د وړاندې کولو مرستیال، ښاغلي مولوي عبدالولي حقاني د مرکزي روغتونونو له رئیسانو سره ناسته ترسره کړه
په یاده ناسته کې هېوادوالو ته د غوره روغتیايي خدمتونو وړاندې کېدو، د ناروغانو روغتیايي ستونزو ته پر وخت رسېدنې او د روغتیايي سیستم د پیاوړتیا اړوند بحث او خبرې ترسره شوې.
د عامې روغتیا وزارت د روغتیايي خدمتونو د وړاندې کولو مرستیال، ښاغلي مولوي عبدالولي حقاني هېوادالو ته د غوره روغتیايي خدمتونو رسول د دې وزارت دنده وبلله او په همدې موخه یې د ټولو هغه روغتیايي کارکوونکو څخه چې هېوادوالو ته په صادقانه ډول خدمت ترسره کوي مننه وکړه او روغتیايي کارکوونکي یې د ولس رېښتیني خدمتګاران وبلل.
د عامې روغتیا وزارت د روغتيايي خدمتونو د وړاندې کولو مرستیال همداراز د مرکزي روغتونونو له رئیسانو وغوښتل، چې ولس ته د غوره روغتیايي خدمتونو په رسولو کې خپله دنده په ریښتیني ډول ترسره کړي؛ تر څو د ټولو ناروغو هېوادوالو روغتیایي ستونزو ته پر وخت رسېدنه ترسره او درملنه یې وشي.
نوموړي همداراز وویل، چې د عامې روغتیا وزارت هڅه کوي؛ ترڅو د روغتیا په برخه کې د موجوده امکاناتو او تجهیزاتو تر څنګ له هرې ممکنې لارې روغتیایې سیستم پیاوړی او په کور دننه ولس ته معیاري روغتیايي خدمتونه وړاندې کړي.
