د افغانستان اسلامي امارت د عامې روغتیا وزیر، ښاغلي ډاکتر قلندر عباد د استقلال ملي او تخصصي روغتون له روغتیايي خدمتونه لیدنه ترسره کړه
د عامې روغتیا وزیر ښاغلي ډاکټر قلندر عباد د استقلال ملي او تخصصي روغتون د ټولو روغتیايي څانکو د لیدنې تر څنګ د روغتیايي کارکوونکو کړنې وستایلې او له هغوی یې وغوښتل؛ تر څو هېوادوالو ته په ریښتیني ډول معیاري روغتیايي خدمتونه وړاندې کړي.
ښاغلي وزیر، همداراز د یوې غونډې په ترڅ کې د یاد روغتون د روغتیايي کارکوونکو ستونزې واورېدې او د بشپړ حل ډاډ یې ورکړ.
نوموړي، روغتیايي کارکوونکي د روغتیایي سکتور اتلان وبلل او ویې ویل، چې موږ په هڅه کې یو؛ تر څو په کور دننه د روغتیايي پرسونل د ظرفیت لوړولو تر څنګ، ګڼ شمېر ډاکټران د تخصصي زده کړو لپاره بېلا بېلو بهرنیو هېوادونو ته واستوو.
ښاغلي وزیر همداراز، د روغتیايي کارکوونکو د معاشونو په اړه وویل: ( موږ د یو منظم پلان له مخې یوه لایحه ترتیب کړې، چې له مخې به یې په راتلونکي کال کې د ټولو روغتیايي کارکوونکو معاشونه د هغوې د علمي سطحو د معیار په بنسټ لوړ کړو.)
