د پالیسۍ او پلان مرستیال د بغلان له والي سره وکتل
چهارشنبه، سلواغه ٢٧/١٤٠٠
د عامې روغتیا وزارت د پالیسۍ او پلان مرستیال ډاکتر محمد حسن غیاثي له مل پلاوي سره په یوه رسمي سفر بغلان ولایت ته تللی او د یوې ناستې په ترڅ کې د دغه ولایت له والي ښاغلي قاري بختیار معاذ سره یې وکتل.
په دې ناسته کې دواړو لورو د روغتيايي خدمتونو د وړاندې کولو د ښه والي، د روغتيايي کارکوونکو د معاشونو د ورکړې، په نشه يي توکو د روږدو کسانو د درملنې او د بغلان ولايتي روغتون د نساجۍ روغتون ودانۍ ته د لېږدولو په باب یې خبرې وکړې او د دغه ولایت والي د عامې روغتيا وزارت له مشرتابه څخه وغوښتل چې د روغتیایي خدمتونو وړاندې کولو د کیفیت لوړولو او د بغلان ولایت د خلکو روغتیايي وضعیت ته باید زیاته پاملرنه وشي.
د عامې روغتیا وزارت د پالیسۍ او پلان مرستیال په دغه ولایت کې د روغتیايي کارکوونکو له کار او هلو ځلو مننه وکړه او ژمنه یې وکړه چې د روغتیا وزارت مشرتابه د روغتیايي خدمتونو وړاندې کولو د کیفیت لوړولو، معاشونو د ورکړې، په نشه یي توکو د روږدو ناروغانو د درملنې، د ولايتي روغتون د لېږد او د بغلان ولايت د اړمنو کسانو روغتيايي حالت ته به پاملرنه کوي او په دې برخه کې هڅې روانې دي.
