پکتیا کې د درملو خوندیتوب او څارنې په برخه کې درې ورځنۍ ښوونیزه دوره ترسره شوه
د عامې روغتیا وزارت له لوري د پکتیا ولایت د عامې روغتیا ریاست په چوکاټ کې د درملو د خوندیتوب او څارنې (فارماکوویجیلانس) په اړه درې ورځنۍ ښوونیزه دوره ترسره شوه.
په دغې روزنيزه دوره کې د دولتي او خصوصي روغتونونو او کلینیکونو یو شمېر روغتیايي کارکوونکو ګډون کړی و، چې د درملو د ناوړه عوارضو د پېژندنې، راپور ورکولو او مدیریت، د درملو د خوندیتوب او د درملو د معقول استعمال په اړه یې زده کړې ترلاسه کړې.
همدارنګه، د درملو د ناوړه عوارضو د راپور ورکولو بهیر د پیاوړتیا په موخه، روغتیايي مرکزونو ته د راپور ورکولو فورمې او د حساسیت کارتونه هم ووېشل شول.
