په کابل ښار کې د زړه ناروغیو درملنې ۱۰۰ بستریز روغتون د جوړولو لومړنيو چارو په موخه د آسیا پراختیایي بانک له استازو سره ناسته تر سره شوه
دا ناسته د عامې روغتیا وزارت د روغتیایي پراختیا او پالیسۍ مرستیال، ښاغلي ډاکټر محمد حسن غیاثي په مشرۍ د وزارت مرکزي رئیسانو او د آسیا پراختیایي بانک د استازو په شتون کې د روغتیایي پراختیا او پالیسۍ معینیت په دفتر کې ترسره شوه.
ټاکل شوې ده، چې د آسیا پراختیایي بانک د کابل ښار په چمن میر واعظ سیمه کې د زړه ناروغیو درملنې ۱۰۰ بستریز روغتون جوړ کړي، چې په دې ناسته کې یې د لومړنيو چارو په اړه بحث او خبرې تر سره شوې.
په دې ناسته کې د روغتیایي پراختیا او پالیسۍ مرستیال، ځانګړې تخنیکي کمېټې وټاکلې؛ تر څو د زړه ناروغیو درملنې روغتون جوړولو برخه کې د چارو پرمختګ لپاره د آسیا پراختیایي بانک له استازو سره هر اړخیزه همکاري وکړي.
بل لور د آسیا پراختیایي بانک د پروژې مدیریت متخصص، ښاغلي منظور مرشد او مل ټیم په دې برخه کې د عامې روغتیا وزارت له همکارۍ څخه په مننې ژمنه وکړه، چې د دوی کاري ټیم د عامې روغتیا وزارت سره په همکارۍ د زړه ناروغیو درملنې روغتون د جوړولو لومړنۍ چارې پیل کړي او په نږدې راتلونکي کې به د دې موضوع په اړه د لا زیاتو معلوماتو په موخه یو ورکشاپ جوړ کړي.
