د CBHC پروګرام تر چتر لاندې د ولایتي روغتیايي کارکوونکو لپاره د نقشې اخیستنې دوه ورځنی ورکشاپ
د عامې روغتيا وزارت د ناروغيو د مخنيوي او کنټرول لوی ریاست تر چتر لاندې د لومړنیو روغتيايي خدمتونو ریاست اړوند د(CBHC) ډيپارټمنت له لورې نږدې ۳۰ تنو ولایتي روغتيايي کارکوونکو ته د(نقشې اخېستنې) تر سرلیک لاندې دوه ورځنی ورکشاپ پرانيستل شو.
د ياد ورکشاپ د پرانيستې مراسمو کې د عامې روغتيا وزارت مرکزي رئيسانو، آمرینو، د همکارو مؤسسو استازو او نورو اړوند مسؤلینو ګډون کړی و.
د عامې روغتيا وزارت د لومړنيو روغتيايي خدمتونو وړاندې کولو رئيس ډاکټر ذبيح الله حارث د یاد ورکشاپ پرانيستې مراسمو کې وويل: د یاد پروګرام له جوړولو څخه یې موخه ولايتونو کې د نويو روغتيايي رضاکارانو انتخاب، تحصیلي سطحې معلومول او د هغوي لپاره تشویقي ورکړه ده، څو له لارې یې په اسانۍ سره ټولنې ته لومړني روغتیايي خدمتونه ورسول شي.
دغه ورکشاپ چې د يونيسف ادارې په مالي ملاتړ جوړ شوی په کې د تطبيق کوونکو مؤسسو د(CBHC) ولايتي افسرانو او د یادې ادارې ولایتي مسوولینو ګډون کړی و.
