د پوهاند غضنفر انسټېټیوټ د نصاب ارزونې او معیاري کېدو په اړه د عامې روغتیا وزارت له رهبرۍ سره خبرې وکړې
د ا.ا.ا د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي د پوهاند غضنفر روغتیايي علومو انسټېټیوټ له مسؤلینو سره د تعلیمي نصاب کیفیت لوړولو اړوند ناسته تر سره کړه
په دې ناسته کې د پوهاند غضنفر روغتیایي علومو انسټېټیوټ د ټولو څانګو د نصاب او مفرداتو ارزونې، د نصاب د یو شان والي او معیاري کېدو لپاره د واحد سیستم رامنځته کولو او د خصوصي انسټېټیوټونو د ریاست له لوري د جوړ شوي ډیټابېس ارزونې او د عملي کېدو په برخه کې ورسره د همکارۍ اړوند بحث او خبرې تر سره شوې.
د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي روغتیا برخه کې د زدهکړو کیفیت لوړول د عامې روغتیا وزارت له لومړیتوبونو څخه وباله او ویې ویل، د دې لپاره چې د هېواد په ټولو روغتیايي انسټېټیوټونو کې یو ډول تدریس تر سره شي، اړتیا ده چې د پوهاند غضنفر روغتیايي علومو انسټېټیوټ د ټولو څانګو د نصاب ارزونه تر سره او د نصاب د یو ډول والي او معیاري کېدو لپاره یو واحد سیستم رامنځته شي؛ تر څو په ټولو روغتیايي انسټېټیوټونو کې د یو معیاري نصاب له مخې تدریس تر سره شي.
د مالي او اداري چارو مرستیال همداراز، د یادې کمېتې غړو ته د بشپړې همکارۍ ډاډ ورکړ او زیاته یې کړه په دې برخه کې به ټولې شریک شوي وړاندیزونه د عامې روغتیا وزارت له رهبرۍ سره شریک کړي.
