د هلمند په سنګین ولسوالۍ کې یو بشپړ جامع روغتون پرانیستل شو
د ا.ا.ا. د عامې روغتیا وزیر، ښاغلي مولوي نور جلال جلالي هلمند ولایت ته د خپل سفر پر مهال د دې ولایت سنګین ولسوالۍ کې د نږدې شپږ ویشت میلیونه افغانیو په ارزښت د یو ، نوي جوړ شوي بشپړ جامع روغتیايي مرکز پرانیسته ترسره کړه
په همدې موخه جوړو شوو مراسمو کې د عامې روغتیا وزیر، ښاغلي مولوي نورجلال جلالي، د هلمند ولایت والي الحاج مولوي عبدالرحمن مسلم ، د هلمند ولایت د عامې روغتیا رئیس مولوي شفیع الله او ځایي اوسیدونکو ګډون کړی و.
د عامې روغتیا وزیر، ښاغلي مولوي نور جلال جلالي د هلمند ولایت سنګین ولسوالۍ کې په یاد جوړ شوي روغتیايي مرکز خوښي وښوده او د سنګین ولسوالۍ اوسیدونکو ته یې د روغتیایي خدمتونو په برخه کې لویه لاسته راوړنه وبلله.
ښاغلي وزیر یاد روغتیايي مرکز ته په اشارې وویل ، هڅه کوو د هیواد هر وګړي ته معیاري خدمات برابر او د ولسونو اړتیاوو ته په اساسي شکل کار تر سره کړو.
د یادونې وړ ده چې د عامې روغتیا وزارت له لوري د هیواد په بیلا بیلو سیمو کې د روغتیايي سیستم په انکشاف او پراختیا ګړندۍ هڅې جریان لري چې په ائینده کې به د یو خودکفاء او معیاري روغتیايي سیستم لپاره مرستندوی اوسي.
