د عامې روغتیا وزیر د هیواد ۳۴ ولایتونو له رئیسانو سره انلاین مجلس تر سره کړ
د ا.ا.ا د عامې روغتیا وزیر، ښاغلي مولوي نور جلال جلالي د هېواد ۳۴ ولایتونو د عامې روغتیا له رئیسانو سره د ولسوالیو کچې عمومي روغتونونو جوړېدو برخه کې د چارو پر څرنګوالي، د کوچني اختر په شپو ورځو کې د روغتیايي خدمتونو فعال ساتلو او د ساري ناروغیو مخنیوي اړوند انلاین لیدنه ترسره کړه
په دې لیدنه کې چې د عامې روغتیا وزارت روغتیايي خدمتونو وړاندې کولو مرستیال، ښاغلي مولوي عبدالولي حقاني هم شتون درلود، ښاغلي وزیر د ولسوالیو کچې عمومي روغتونونو جوړېدو برخه کې د چارو پر څرنګوالي لازمې لارښوونې او سپارښتنې ترسره او د اختر را رسېدو په موخه یې ټولو ولایتي رئیسانو ته لارښوونه وکړه؛ ترڅو هېوادوالو ته د روغتیايي خدمتونو وړاندې کولو برخه کې لا زیاتې اسانتیاوې رامنځته او د اختر په شپو ورځو کې روغتیايي مرکزونه فعال وساتي.
د عامې روغتیا وزیر همداراز، د ساري ناروغیو پر وړاندې د مبارزې پر لا ښه والي او د واکسیناسیون برنامې په ښه تطبیق ټینګار وکړ.
بل لور ولایتي رئیسانو د روغتیا وزارت رهبرۍ ته د ولسوالۍ کچې عمومي روغتونونو جوړېدو برخه کې په غوره توګه د لومړنیو چارو پر مخ وړلو ډاډ څرګند او په دې برخه کې یې شته پوښتنې شریکې کړې، چې د تخنیکي ټیم له لوري ورته معلومات ورکړل شول.
دغه راز د روغتیایي خدمتونو وړاندې کولو مرستیال هم د ناستې په پای کې ولایتي مسؤلینو سره د روغتیايي خدمتونو برخه کې د درملو تر لاسه کولو او عمومي روغتونونو اړوند، خپلې سپارښتنې شریکې کړې.
