د عامې روغتیا وزیر د امام ابو حنیفه ملي او نړیوال نندارتون پرانیستې مراسمو کې ګډون وکړ
د افغانستان اسلامي امارت د عامې روغتیا وزیر، ښاغلي مولوي نور جلال جلالي د امام ابوحنیفه دریم ملي او نړیوال نندارتون پرانیستې مراسمو کې ګډون وکړ
د یاد نندارتون پرانیستو مراسمو کې د ریاست الوزراء اقتصادي مرستیال ملا عبدالغني برادر په شمول د عامې روغتیا وزیر ښاغلي مولوي نورجلال جلالي، د اسلامي امارت ګڼو نورو لوړپوړو مسئولینو او سوداګرو ګډون کړی و.
د عامې روغتیا وزیر، ښاغلي مولوي نور جلال جلالي یاد نندارتون کې د وینا پرمهال د خصوصي سکتور په پیاوړي کېدو خوښي وښوده او زیاته یې کړه "د خوښۍ ځای دی چې زیاتره طبي وسایل او درمل چې پخوا به له نورو ملکونو واردېدل، اوس د هېواد په داخل کې جوړیږي".
د عامې روغتیا وزیر دغه راز یاد نندارتون کې د روغتیا په برخه کې د اسانتیاوو رامنځته کېدو په اړه د معلوماتو وړاندې کولو ترڅنګ له سوداګرو غوښتنه وکړه چې روغتیايي برخه کې پانګونې ته توجه لا زیاته کړي.
نوموړي همداراز د روغتیا برخه کې د تولیدي شرکتونو مسؤلینو ته سپارښتنه وکړه، چې د خپلو تولیداتو کیفیت او د بیو کموالي ته ځانګړې پاملرنه وکړي.
د یادونې وړ ده، چې د امام ابوحنیفه دریم ملي او نړیوال نندارتون کې د نورو داخلي تولیداتو ترڅنګ د روغتیا برخې ګڼ وسایل او درمل هم نندارې ته وړاندې شوي وو.
