د عامې روغتیا وزارت یو لوړ پوړي پلاوي هندوستان ته د سفر په ترڅ کې د دې هېواد د ایوروید او دودیز طب له مشهورو او څو ملتي شرکتونو سره جلا لیدنې ترسره کړې
په دې لیدنو کې د درملو د برابرولو، پانګونې او روغتیا برخه کې د دوه اړخیزو همکاریو پر امکاناتو هر اړخیز بحث او خبرې تر سره شوې.
یادو هندي شرکتونو ژمنه وکړه، چې افغانستان ته به معیاري آیوروید، د سنتي طب برخه کې اسانتیاوې او دودیز درمل په مناسبه او ټیټه بیه برابر کړي، څو افغان ولس ته خوندي او اغېزمن درملیز خدمات ورسېږي.
همدارنګه، دغو څو ملتي شرکتونو په افغانستان کې د روغتیايي مرکزونو د جوړولو او د طبي خدماتو د پراختیا لپاره خپله لېوالتیا څرګنده او د عامې روغتیا وزارت دا هڅه یې د هېواد د روغتیايي نظام پیاوړتیا او د درملو د لاسرسي د ښه والي لپاره یو مهم ګام وباله.
د یادونې وړ ده، چې دا لیدنې د افغانستان او هندوستان ترمنځ د آیوروید او دودیز طب برخه کې د همکاریو د پراختیا لپاره یوه مهمه او هیله بښوونکې هڅه ګڼل کېږي.
