د عامې روغتیا وزارت له لوري د عدلي طب ریاست تر چتر لاندې په لمړي ځل د (DNA) معایناتو اړوند لابراتوار پرانیست غونډه ترسره شوه
په همدې موخه جوړو شویو مراسمو کې د عامې روغتیا وزیر ښاغلي مولوي نور جلال جلالي، د روغتیايي خدمتونو وړاندې کولو مرستیال ښاغلي مولوي عبدالولي حقاني، د مقام د دفتر لوی رئیس شیخ محمد طاهر حلیم، یو شمېر مرکزي رئیسانو، د بېلابېلو ادارو او رسنیو استازو ګډون کړی و.
د عامې روغتیا وزیر، ښاغلي مولوي نور جلال جلالي د یاد لابراتوار په پرانیسته خوښي څرګنده کړه او دا پرانېسته یې د عدلي طب برخه کې یوه مهمه لاسته راوړنه وبلله ، ښاغلي وزیر د خپلې وینا پر مهال وویل : د دې څانګې د فعالیدو لپاره مو ځانګړې کمیټه ټاکلې وه تر څو چارې یې ژر تر سره شي ، دا چې دا څانګه د روغتیایي سیستم په چوکاټ کې ځانګړی ارزښت لري ورته به لا پاملرنه وشي ، نوموړي په خپلې وینا کې وویل ، د دې لپاره چې دا څانګه لا پیاوړې شي له تیرې یوې میاشتې مو شپږ تنه د اردن هیواد څخه راغلي ټرینر په توسط لا ښه وروزل ، تر څو اړونده برخه لا غني شي ، ښاغلي وزیر وویل تر ټولو مهم د ولس لپاره د خدمت تعهد او اخلاص دی چې باید د مسؤولیت پر مهال یې ولرو.
د مجلس په جریان کې د روغتیایي خدماتو وړاندې کولو مرستیال ښاغلي مولوي عبدالولي حقاني وویل ، هڅه مو دا ده چې د روغتیایي خدماتو کیفیت هر اړخیز ښه او د اړونده برخو لپاره لا پرمختللي وسایل چمتو کړو ، ښاغلي مرستیال د خپلو خبرو په جریان کې د یو شمېر نورو هڅو یادونه وکړه او په وینا یې د روغتیایي خدماتو د پراختیا او کیفیت لپاره لا هڅې جریان لري.
همدارنګه د عامې روغتیا وزارت د مقام د دفتر لوی رئیس شیخ محمد طاهر حلیم د عامې روغتیا وزارت په هڅو ، او د روغتیایي خدماتو پر پراختیا مفصلې خبرې وکړې ، نوموړي په دې برخه کې د رهبرۍ له هڅو او زیار یادونه وکړه او د دې برخې پرانسته یې د دوامداره هڅو پایله وبلله.
د عدلي طب رئیس ښاغلي مولوي نجیب الله فاروقي د خپلې وینا پر مهال وویل د دې لابراتوار په فعالېدو سره د لومړي ځل لپاره په هېواد کې د (DNA) معایناتو د تشخیص خدمات پیل شول، چې د دغو خدماتو پر پیل، ډیپارټمنټ او تجهیزاتو باندې په عمومي توګه نږدې ۴۰ میلیونه افغانۍ لګښت شوی دی.
