د عامې روغتیا وزارت د داخلي تفتیش رئیس، کندز ته د سفر په ترڅ کې د دې ولایت له والي سره لیدنه وکړه
د عامې روغتیا وزارت د داخلي تفتیش رئیس، مولوي محمد سلیم حقاني او مل پلاوي کندز ولایت د سفر په ترڅ کې د دې ولایت له والي، ښاغلي حاجي دعوت سره لیدنه ترسره کړه.
په دې لیدنه کې د عامې روغتیا وزارت د داخلي تفتیش رئیس وویل، د دې لیدنې موخه په دغه ولایت کې د روغتیايي سکټور پیاوړتیا، لا زیاته همغږي، له خصوصي سکټور څخه تفتیش او په دې برخه کې همکاري ده.
همداراز د کندز والي وویل، د ولایتي ادارو د ارزونې او نظارت لپاره یوه ځانګړې کمېټه ټاکل شوې وه، چې د خپلو مسؤلیتونو سربېره یې د عامې روغتیا ریاست څخه هم څارنه کړې ده. هغه زیاته کړه: " تاسو هم کولای شئ په خپلواکه توګه خپل تفتیش ترسره کړئ او موږ په ادارو کې د شفافیت او اصلاحاتو غوښتونکي یو.”
دغه راز، مولوي محمد سلیم حقاني وویل: "موږ به خپل هر اړخیز تفتیش ترسره او راپور به یې د ولایت مقام او عامې روغتیا وزارت له رهبرۍ سره شریک کړو".
سربېره پر دې، د عامې روغتیا وزارت د داخلي تفتیش رئیس، د کندز له والي څخه د غونډو په تنظیمولو، په اغېزمنه توګه د چارو تطبیق او تفتیش کې د لا زیاتې همکارۍ غوښتنه وکړه، چې د دغه ولایت والي ورسره دې برخه کې د اړینې همکارۍ ژمنه وکړه.
