د عامې روغتیا وزارت د ارزونې رئیس په هرات کې د روغتیايي خدمتونو ارزونه وکړه
د عامې روغتیا وزارت د ارزونې، تحلیل او د ارقامو تجزیې رئیس، ډاکټر خان مسلم هرات ته د خپل سفر پر مهال د دغه ولایت د یو شمېر جامع روغتیايي مرکزونو او د گذره ولسوالۍ روغتون د روغتیايي خدمتونه ارزونه وکړه
د دغې ارزونې په ترڅ کې د روغتیايي خدمتونو کیفیت، ناروغانو ته د خدمتونو وړاندې کولو بهیر، د روغتیايي کارکوونکو شتون او کاري نظم، د درملو او طبي تجهیزاتو موجودیت او مدیریت، د لابراتوارونو وضعیت، د واکسیناسیون خدمتونه، حفظالصحه، د مور او ماشوم روغتیايي خدمتونه، د ثبت او راپور ورکولو سیستم، د روغتونونو نظافت او د انتاناتو د کنټرول اصولو رعایت د عامې روغتیا وزارت له معیارونو سره سم وارزول شول.
همدارنګه، د ارزونې پر مهال د روغتیايي خدمتونو د کیفیت پر لوړولو، د ساري ناروغیو د کنټرول مسلکي اصولو پر مراعتولو، له شته امکاناتو څخه پر اغېزمنې ګټې اخیستنې او مراجعینو ته د معیاري روغتیايي خدمتونو پر وړاندې کولو ټینګار وشو.
