د عامې روغتیا وزارت او WHO ترمنځ د سرویلانس او بېړنیو روغتیايي پېښو د پیاوړتیا په اړه ناسته
د عامې روغتیا وزارت د څارنې او پلټنې لوی رئیس، مفتي عبدالقدوس هاشمي د روغتیا نړیوال سازمان له استازو سره د بېړنیو روغتیايي پېښو او د سرویلانس ډیپارټمنټ د اوسني وضعیت په موخه ناسته ترسره کړه
په دې ناسته کې د سرویلانس سیستم د فعالیتونو، بېړنیو روغتیايي پېښو د مدیریت، د ناروغیو مخنیوي او کنټرول، پر وخت تشخیص او چټک غبرګون او د روغتیايي معلوماتو راټولولو او ارزونې په اړه بحث او خبرې تر سره شوې.
مفتي عبدالقدوس هاشمي د روغتیا نړیوال سازمان له همکاریو او تخنیکي ملاتړ څخه مننه وکړه او د روغتیايي ننګونو پر وخت تشخیص او اغېزمن ځواب ویلو په موخه یې د سرویلانس سیستم پر پیاوړتیا ټینګار وکړ.
همدارنګه، د روغتیا نړیوال سازمان استازو هم د خپلو همکاریو پر دوام د ټینګار تر څنګ ډاډ ورکړ، چې د سرویلانس، بېړنیو روغتیايي پېښو، ظرفیت لوړونې او د ناروغیو مخنیوي او کنټرول برخو کې به خپلو تخنیکي او مسلکي همکاریو ته دوام ورکړي.
د ناستې په پای کې دواړو لوریو د روغتیايي خدمتونو د کیفیت ښه والي، د سرویلانس سیستم د لا پیاوړتیا او د عامې روغتیا پر وړاندې د شته ننګونو مخنیوي لپاره د ګډو هڅو پراختیا په اړه خپل نظرونه او وړاندیزونه شریک کړل.
