د روغتیايي خدمتونو وړاندې کولو مرستیال د یو شمیر ولایتونو د عامې روغتیا رئیسانو سره انلاین لیدنه تر سره کړه
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني په خپل کاري دفتر کې د هرات، بادغیس او غور ولایتونو د عامې روغتیا رئیسانو سره د روغتیا په برخه کې د وروستیو پرمختګونو او د موجود ستونزو د حل په موخه انلاین لیدنه ترسره کړه
ولایتي رئیسانو د روغتیا په برخه کې وروستي پرمختګونه او موجوده ستونزې د عامې روغتیا وزارت له رهبرۍ سره شریک کړل او د ستونزو د حل غوښتونکي شول.
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني په یادو ولایتونو کې د روغتیا په برخه کې وروستي پرمختګونه وستایل او د اړمنو هېوادوالو روغتیايي ستونزو ته د بشپړې رسېدنې او معیاري درملنې په موخه یې د نیمګړو روغتیايي پروژو تکمیل، روغتونونو او روغتیايي مرکزونو ته پر وخت د درملو او نورو اړینو روغتیایي توکو او لابراتواري موادو رسول اړین وبلل او له مسؤلینو یې وغوښتل، چې دې برخو ته جدي پاملرنه وکړي.
نوموړي همداراز د یادو ولایتونو روغتیايي مسؤلینو ته د موجوده ستونزو د حل په موخه د لازمو اقداماتو ترسره کېدو ډاډ ورکړ.
