د روغتیايي خدمتونو وړاندې کولو مرستیال د راستنېدونکو کډوالو لپاره د غوره روغتیایي خدماتو وړاندې کولو په موخه تورخم ته سفر ترسره کړ
د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني او مل پلاوي هېواد ته د راستنېدونکو کډوالو لپاره د غوره روغتیایي خدماتو وړاندې کولو په موخه تورخم ته سفر ترسره کړ
دغه سفر چې د اړوندو معینیتونو مشاورینو، یو شمېر مرکزي رئیسانو او ننګرهار عامې روغتیا رئیس په ملتیا ترسره شو، په کې د بېرته راستنېدونکو کډوالو لپاره د روغتيايي خدماتو جوړې شوې کمېټې رئيس او غړو سره د شته ستونزو، ضرورتونو او غوره روغتيايي خدمتونو وړاندې کولو په اړه بحث او خبرې وشوې.
دغه راز، د کډوالو په کمیپ کې له جوړو شویو روغتیایي مراکزو، سیارو روغتیایي ټیمونو او د ساري ناروغیو مخنیوي په موخه له وقایوي خدماتو څخه څارنه ترسره شوه.
د یاد سفر په ترڅ کې د روغتیایي خدمتونو وړاندې کولو مرستیال اړوندو مسؤلینو ته د ښې همغږۍ او غوره روغتیایي خدمتونو وړاندې کولو په اړه لازمې سپارښتنې وکړې؛ ترڅو د بېرته راستنېدونکو کډوالو روغتیایي ستونزو ته پر وخت رسېدنه وشي.
