د اکمال تخصص پروګرام کې شاملو ډاکترانو څخه په مرکز او ولایتونو کې د ازموینې اخیستلو پروسه پیل شوه
د یادې تحریري ازموینه پر مهال د عامې روغتیا وزارت مالي او اداري چارو مرستیال، ښاغلي ملا بخت الرحمن شرافت، د اکمال تخصص لوی رئیس ډاکتر نثار احمد نیازي، د دغه ریاست مسؤلینو، اړوندو استادانو او د بېلابېلو ادارو استازو شتون درلود.
په دغه ازموینه کې د اکمال تخصص برنامې ته شاملو شاوخوا ۴۰۰ تنه ډاکترانو ګډون کړی و او په ۹ څانګو (داخله اطفال، عمومي جراحي، د ماشومانو اُرتوپېدي، قلبي داخله، صدري داخله، راډیولوژي، جلدي، نسایي ولادي او هسټوپټالوژي) کې ترې ازموینه واخیستل شوه.
په دې ازموینه کې د هرې څانګې ډاکټرانو لپاره "۲۰" څلور ځوابه پوښتنې جوړې شوې وې، چې د حل لپاره یې یو ساعت وخت په پام کې نیول شوی و، چې دا پوښتنې د اکمال تخصص لوی ریاست مسؤلینو او استادانو له لوري په خوندي توګه د یوې شفافې پروسې له مخې چمتو شوي دي.
د یادونې وړ ده، چې دا تحریري ازموینه د ۱۴۰۳ لمریز کال اکمال تخصص برنامې کې شاملو ډاکترانو د ظرفیت لوړونې لپاره اخیستل کېږي او ټول ډاکټران چې په دې برنامه کې شامل دي (له لومړي کال څخه تر وروستي کال پورې) په بر کې نیسي، چې ازموینه به یې په ټولو څانګو کې په مرکز او ولایتونو کې درې ورځې دوام وکړي.
