اندراګاندي ماشومانو د درملنې روغتون کې د اکسیجن د تولید څانګې د جوړېدو د بنسټ ډبره کېښودل شوه
په همدې موخه جوړو شوو مراسمو کې د عامې روغتیا وزارت د روغتیايي خدمتونو د وړاندې کولو مرستیال، ښاغلي مولوي عبدالولي حقاني، د مرکزي ریاستونو یو شمېر رئیسانو او د روغتیا نړیوال سازمان استازي، ډاکتر زیار شتون درلود.
د عامې روغتیا وزارت د روغتیايي خدمتونو د وړاندې کولو مرستیال، ښاغلي مولوي عبدالولي حقاني د اندراګاندي د ماشومانو د درملنې په روغتون کې د اکسیجن د تولید څانګې جوړېدل د روغتیايي خدمتونو د کیفیت لوړولو او په هېواد کې د ماشومانو په تېره بیا د هغو ماشومانو روغتیايي ستونزو د حل په برخه کې مهم ګام وباله، چې اکسیجن ته اړتیا لري.
نوموړي همداراز د یاد روغتون د بېلا بېلا روغتیايي څانګو څخه لیدنه ترسره او د روغتیايي کارکوونکو څخه یې وغوښتل، چې خپلې دندې په ایماندارۍ سره ترسره کړي؛ تر څو د اړمنو هېوادوالو روغتیايي ستونزو ته پر وخت رسېدنه وشي.
د یادونې وړ ده، چې د اندراګاندي د ماشومانو د درملنې په روغتون کې د اکسیجن یاد پلانټ به د څلورو جنراتورونو په لرلو سره د روغتیا نړیوال سازمان په مالي او تخنیکي همکارۍ جوړ شي، چې په ۲۴ ساعتونو کې به د ۲۰۰ بالونونو اکسیجن د تولید ظرفیت ولري او مرسته به یې د یاد روغتون ناروغانو ته د بشپړ اکسیجن رسولو تر څنګ نورو روغتونونو ته هم د اړتیا وړ اکسیجن استول کېږي.
