د عامې روغتیا وزارت رهبرۍ د ځینو ولایتونو د رئیسانو سره انلاین لیدنه تر سره کړه
د افغانستان اسلامي امارت د عامې روغتیا وزیر، ښاغلي مولوي نور جلال جلالي او د روغتیايي خدمتونو وړاندې کولو مرستیال، ښاغلي مولوي عبدالولي حقاني د کاپيسا، پروان او پنجشېر ولایتونو د عامې روغتیا له رئیسانو سره انلاین لیدنه ترسره کړه
په دې لیدنه کې د تطبیق کوونکو مؤسسو د فعالیتونو، سپینو ساحو ته د روغتیايي خدمتونو رسولو، روغتیايي مرکزونو ته پر وخت د درملو او اړینو طبي توکو رسولو، کلیوالو سیمو ته د روغتیايي خدمتونو د پراختیا، روغتیايي مرکزونو ته د ارتقاء ورکولو او د ولسوالۍ کچې روغتونونو جوړېدو اړوند بحث او خبرې ترسره شوې.
د عامې روغتیا وزیر، ښاغلي مولوي نور جلال جلالي د ولایتي روغتیا رئیسانو وړاندیزونه واورېدل او له اړوندو مسؤلینو یې وغوښتل چې په دې برخو کې خپلې چارې په سمه توګه ترسره او په اړه یې لازم اقدامات وکړي.
