د عامې روغتیا وزارت د نظارت رئیس د بادغیس ولایت له روغتیايي مرکزونو څخه لیدنه او څارنه وکړه
د عامې روغتیا وزارت د نظارت رئیس، ډاکټر کریم الله حلیمي بادغیس ولایت ته سفر په ترڅ کې د BPHS او EPHS ورټیکل پروژو او یو شمېر خصوصي روغتیايي مرکزونو څخه نظارت تر سره کړ
یاد نظارت چې موخه یې د هېواد په دولتي او خصوصي روغتونونو کې د روغتیایي خدمتونو کیفیت لوړل، هېوادوالو ته په معیاري توګه د روغتیايي خدمتونو وړاندې کول او د چارو شفافیت دی، ترڅ کې یې ډاکټر کریم الله حلیمي او مل تخنیکي ټیم د بادغیس د عامې روغتیا له رئیس، خان محمد همت سره لیدنه تر سره، د سفر موخه یې ورسره شریکه کړه او د جوړ شوي پلان سره سم یې د یاد ولایت په مرکز او جوند، بالامرغاب، قادس، غورماچ، مقر، آب کمري او سنګ آتش ولسوالیو کې د یو شمېر روغتیایي مرکزونو له ټولو څانګو څخه نظارت ترسره کړ.
د دغه نظارت په ترڅ کې د یادو روغتیايي مرکزونو موجوده ستونزې او نیمګړتیاوې په نښه او د حل په موخه له اړوندو مسؤلینو سره شریکې شوې.
همداراز د نظارت رئیس، روغتیایي کارکوونکو ته سپارښتنې وکړې، چې د ناروغانو ستونزو ته د رسېدنې او درملنې برخه کې لا زیاتې او نه ستړې کېدونکې هڅې وکړي.
