د عامې روغتیا وزارت د پلان او پالیسۍ لوی ریاست له لوري د روغتیا ملي ستراتیژۍ د تدوین په اړه د روغتیا نړیوال سازمان له استازو سره غونډه ترسره شوه
یاده غونډه د پلان او پالیسۍ لوی رئیس، ډاکټر سید رسول منګل په مشرۍ د نوموړي په کاري دفتر کې ترسره شوه، چې په کې د رهبرۍ کمېټې تېرې ناستې د پرېکړو، ملي ستراتېژۍ د تدوین او په کې د شاملو موضوعاتو اړوند بحث او خبرې ترسره شوې.
په دې غونډه کې د پلان او پالیسۍ لوی رئیس، ډاکتر سید رسول منګل د رهبرۍ کمېټې د تېرې غونډې راپور او مهمې پرېکړې ګډونوالو ته واورولې، د ملي ستراتېژۍ د تدوین موخه او اړتیا یې روښانه او څرګنده یې کړه، چې د ستراتېژۍ جوړول نه یوازې د راتلونکو پنځو کلونو لپاره د عامې روغتیا وزارت د کار لوری ټاکي؛ بلکې د معیاري، پراخو او متوازنو روغتیايي خدماتو بنسټ هم برابروي.
همداراز، د روغتیا نړیوال سازمان استازو سره د ترسره شویو غونډو پایلې شریکې شوې، چې د یاد سازمان له لوري د تخنیکې همکاریو ژمنې وشوې او د ملي ستراتېژۍ د جوړونې لپاره د لارښود پر مسودې هر اړخیز بحث ترسره شو او پرېکړه وشوه، چې د فرعي کمېټو غړو ته یو درې ورځنی روزنیز ورکشاپ جوړ شي، تر څو د لارښود محتوا په تفصیلي توګه تشریح او د معیاري میتود له مخې د ستراتېژۍ لومړیتوبونه وټاکل شي.
د یادونې وړ ده، چې د عامې روغتیا وزارت د ملاتړ او ژمنتیا په اساس د راتلونکو پنځو کلونو لپاره د روغتیا ملي ستراتيژي په بریالي ډول تدوین او نهايي کېدونکې ده، چې له مخې به یې د هېواد خلکو ته معیاري، پراخ او متوازن روغتيايي خدمات وړاندې کېږي.
