هیواد ته د راستنېدونکو کډوالو لپاره په غوره شکل د روغتیایي خدماتو وړاندې کولو د همغږۍ کمېټې ناسته ترسره شوه!
یاده ناسته چې د عامې روغتیا وزیر ښاغلي مولوي نور جلال جلالي او د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني په مشرۍ د مرکزي رئیسانو او اړوندو معینیتونو د مشاورینو په شتون کې ترسره شوه ، موخه یې د کډوالو لپاره د روغتیايي خدمتونو وړاندې کولو برخه کې غوره مدیریت ، د ساري ناروغیو د کنټرول په موخه د وقایوي خدماتو تر سره کول ، د روغتیایي خدماتو لا په ښه شکل برابرول ، د ټاکل شوې کمېټې د دندو او مسؤلیتونو اړوند د ملي او نړیوالو مؤسسو سره د لا زیاتې همغږۍ او هېواد ته د راستنېدونکو کډوالو روغتیايي حالت د څرنګوالي اړوند خبرې ترسره شوې.
د عامې روغتیا وزیر د روغتیایي خدماتو په ښه شکل تر سره کولو په موخه ، د عملیاتي پلان ارزونې او راستنېدونکو هیوادوالو لپاره د روغتیایي خدمتونو د پراختیا اړوند لازمې سپارښتنې وکړې.
