د هېواد د ستر روحاني شخصیت شیخ الحدیث خلیفه محمد شفیق فضلي له لوري د عامې روغتیا وزارت مسؤلینو او کارکوونکو ته هر اړخیزه علمي، اصلاحي او تربیوي وینا وړاندې شوه
په همدې موخه جوړه شوې ناسته کې، چې د عامې روغتیا وزارت یو شمېر مرکزي رئیسانو، امرینو او کارکوونکو ګډون کړی و، ښاغلي خليفه د انساني نفس اصلاح، زړه پاکوالي، د نیت سمون، اخلاص، تقوا، امانتدارۍ او له ګناهونو څخه د ځان ساتنې په اړه هر اړخیزه او ارزښتناکه علمي او اصلاحي وینا وړاندې کړه.
نوموړي په خپلو خبرو کې د اسلامي او مسلکي مسؤلیتونو پر اهمیت ټینګار وکړ او ویې ویل: هغه څوک چې د خلکو د خدمت په ډګر کې کار کوي، باید خپل کار یوازې د وظیفې په توګه ونه ګڼي؛ بلکې د عبادت، امانت او دیني مسؤلیت په روحیه یې ترسره کړي.
همداراز، نوموړي د نفس او زړه د پاک ساتلو پر ارزښت وینا ترسره او څرګنده یې کړه، چې د انسان ظاهري بریا هغه وخت بشپړېږي، چې له باطني اصلاح، ښو اخلاقو او پاک نیت سره مله وي او هم یې مسؤلین او کارکوونکي وهڅول، چې په خپلو چارو کې صداقت، عدالت، زغم، حوصلې او د ولس خدمت ته لومړیتوب ورکړي.
