د عامې روغتیا وزیر په مشرۍ د هېواد روغتیایي وضعیت د ارزونې او د نظارتونو د پایلو د شریکولو عالي غونډه ترسره شوه
د ا.ا.ا د عامې روغتیا وزیر، ښاغلي مولوي نور جلال جلالي په مشرۍ د هېواد روغتیایي حالت ته د کتنې، په تېر یو کال کې د ترسره شویو نظارتونو د پایلو شریکولو او ستونزو حل په موخه غونډه ترسره شوه
په دې غونډه کې د عامې روغتیا وزارت د روغتیایي خدمتونو وړاندې کولو مرستیال ښاغلي مولوي عبدالولي حقاني، د مقام مشاورینو، مرکزي او ولایتي رئیسانو، د نړیوالو همکارو ادارو او پلي کوونکو مؤسسو استازو ګډون کړی و.
د عامې روغتیا وزیر، ښاغلي مولوي نور جلال جلالي یاده غونډه د ستونزو په حل او د روغتیایي خدماتو ښه والي کې مهمه وبلله او ویې ویل:(د هېواد هر وګړی پر موږ حق لري، چې لازم روغتیایي خدمات ورته ورسوو، د دې لپاره چې يادې موخې ته ورسېږو، نو له دولتي او خصوصي روغتیایي مرکزونو څخه باید هر اړخيز نظارت او څارنه وکړو او دا چاره د عامې روغتیا وزارت له مهمو فعالیتونو څخه ده، چې ستونزو ته د رسېدنې لار پرانیزي).
ښاغلي وزير ټينګار وکړ، چې نظارتونه دې لا اغېزمن شي، له راپورونو او پایلو څخه دې یې لازمه ګټه واخیستل شي او د څارنې او پلټنې لوی ریاست دې له همکارو مؤسسو سره یو ګډ نظارتي ټيم جوړ کړي؛ ترڅو نظارتونه لا اغېزمن، راپورونه یې دقیق او پايلې یې خوندي شي.
همداراز، د عامې روغتیا وزارت د څارنې او پلټنې لوی رئیس، ډاکټر عنایت الله عنایت د یو جامع پریزنټیشن له لارې د هېواد د روغتیایي حالت په اړه معلومات وړاندې کړل او په تېر یو کال کې یې له روغتونونو او روغتیایي مرکزونو څخه د ترسره شویو نظارتونو راپورونه او معلومات له ګډونوالو سره شریک کړل.
ورته مهال، ولایتي رئیسانو هم روغتیا برخه کې خپلې ستونزې او اړتیاوې شریکې کړي، چې د مسؤلینو له لوري ورته د بشپړې پاملرنې ډاډ ورکړل شو.
د یادونې وړ ده، چې په یاده غونډه کې د همکارو ادارو او تطبیق کوونکو مؤسسو استازو خپل نظرونه شریک او وزارت ته یې د خپلو فعالیتونو او خدماتو د لا ښه والي ډاډ ورکړ.
