د عامې روغتیا وزیر د روغتیا نړیوال سازمان له لوړپوړو استازو سره د روغتیایي خدمتونو پیاوړتیا، د ساري ناروغیو درملنې او د مرستو د همغږۍ پر موضوعاتو خبرې وکړې
د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د افغانستان لپاره د روغتیا نړیوال سازمان له مشر ایډوین سینیزا سلاوډر، د روغتیا نړیوال سازمان د افغانستان د پولیو ټیم له مشر مندیپ راټې او د روغتیایي سکټور اړوند مسئولینو سره لیدنه ترسره کړه.
په دې لیدنه کې په افغانستان کې د روغتیا نړیوال سازمان له لوري د تر سره شویو خدماتو، د روغتیا په برخه کې د شته ستونزو حل، روغتیايي سیستم د پیاوړتیا، روغتیایي کارکوونکو د ظرفیت لوړونې، پولیو ناروغۍ د محوه کولو، د سرطان ناروغیو جوړېدونکي روغتون لپاره د وسایلو برابرولو، د روغتیا نړیوال سازمان له لوري هېواد کې د انتاني ناروغیو د درملنې روغتونونو پر ملاتړ، د تطبیق کوونکو مؤسساتو د خدماتو پر کیفیت او انتخاب او د روغتیا په برخه کې د نړیوالو مرستو د جلب اړوند بحث او خبرې وشوې.
د عامې روغتیا وزیر، ښاغلي مولوي نور جلال جلالي له نړیوالو همکارانو سره په ګډه د ولسونو اړتیاوو ته په کتو د روغتیايي خدماتو پر پیاوړي کولو، په معیاري توګه د ناروغانو ستونزو ته د رسېدنې او شته ستونزو د حل په موخه د دوه اړخېزه هڅو یادونه وکړه او ویې ویل، د هغه ټولو ستونزو د حل لپاره باید کار وکړو، چې د روغتیایي سیسټم د پراختیا او پیاوړتیا لامل ګرځي.
ښاغلي وزیر همداراز، د روغتیایي خدماتو پر پراختیا، د سرطان ناروغانو د درملنې روغتون لپاره پر تجهیزاتو او په هېواد کې د انتاني روغتونونو، چې نږدې ۳۵۰ بستره کېږي د خدماتو پر ملاتړ خبرې ترسره او له پولیو او ټولو ساري ناروغیو سره مبارزه یې د روغتیا وزارت د کاري ساحې برخه وګڼله او په وینا یې د ساري ناروغیو سره د مبارزې لپاره اړینه ده، چې د روغتیایي سیسټم پر کیفیت او ښه والي لا کار وکړو.
بل لور د افغانستان لپاره د روغتیا نړیوال سازمان او پولیو د محوې ټیم مشرانو خپلو دوامداره همکاریو ته په اشاري د روغتیا برخې د پیاوړي کولو، مرستو جلب او یو شمېر نورو برخو کې د همکارۍ ډاډ څرګند کړ.
