د عامې روغتیا وزیر د برتانیې له شارژدافیر او نوي استازي سره د روغتیايي همکاریو په اړه لیدنه وکړه
د ا.ا.ا د عامې روغتیا وزیر، ښاغلي مولوي نور جلال جلالي په خپل کاري دفتر کې د افغانستان لپاره د برتانیې سفارت له شارژدافیر، ښاغلي رابرټ چټرټن ډیکسن او د افغانستان لپاره د یاد هېواد له نوي ټاکل شوي استازي، ریچارد لینزي سره په یو شمېر روغتیايي برخو کې د ملاتړ او همکارۍ اړوند لیدنه تر سره کړه
په دې لیدنه کې د افغانستان روغتیايي سیسټم د ښه والي، د عامې روغتیا وزارت د لومړیتوبونو، افغان روغتیايي کارکوونکو د ظرفیت لوړولو، د روږدو، سرطاني ناروغانو او مور او ماشوم روغتیا برخه کې د ملاتړ اړوند بحث او خبرې تر سره شوې.
د عامې روغتیا وزیر، ښاغلي مولوي نور جلال جلالي روغتیا برخه کې د انګلستان هېواد له مرستو او همکاریو څخه د مننې تر څنګ له نوي ټاکل شوي استازي څخه په پورته ذکر شويو برخو کې د ملاتړ غوښتنه وکړه
بل لور د یاد هېواد شارژدافیر او نوي ټاکل شوي استازي خپلو دوامدارو همکاریو ته په اشارې روغتیا برخه کې د ملاتړ او همکارۍ ډاډ څرګند کړ.
