د عامې روغتیا وزارت د اکمال تخصص لوی ریاست له لوري د روغتونونو د معلوماتي ټکنالوژۍ (I.T) برخې کارکوونکو ته د کمپیوټر او انټرنيټ زده کړې دوه ورځنی روزنیز ټریننګ پیل شو
یاد ټریننګ چې موخه یې د معلوماتي ټکنالوژۍ د کارکوونکو ظرفیت لوړونه او له مرکز سره د اړیکو پیاوړتیا ده، په کې د عامې روغتیا وزارت د مالي او ادري چارو مرستیال، ښاغلي ملا بخت الرحمن شرافت او د اکمال تخصص لوی رئیس، ډاکټر نثار احمد نیازي هم ګډون کړی و.
د مالي او ادري چارو، ښاغلي مرستیال ګډونوالو ته سپارښتنې وکړې، چې په ټریننګ کې وړاندې کېدونکي موضوعات زده او په خپلو کاري ساحو کې ترې لازمه استفاده وکړئ؛ تر څو په چارو کې اسانتیاوې رامنځته او معلومات خوندي وساتل شي.
په دغه ټریننګ کې ګډونوالو ته د کمپیوټر د بنسټیزو مهارتونو، د انټرنیټ کارولو لارو چارو، د معلوماتو خوندي ساتلو او ډیجټلایز کولو، له ډیټابېس څخه د لازم کار اخیستلو او نورو اړوندو مسلکي مهارتونو په اړه معلومات ورکړل شول.
