د روغتیايي خدمتونو وړاندې کولو مرستیال د عزیزي خیریه بنسټ له رئیس سره لیدنه ترسره کړه
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني په خپل کاري دفتر کې د عزیزي خیریه بنسټ له رئیس، ښاغلي عزت الله نیازمند سره لیدنه ترسره کړه
په دې لیدنه کې د عزیزي خیریه بنسټ له لوري د یو روغتون د جوړېدو په اړه، چې د ۶۲۷ بسترونو په درلودلو سره به په وړیا توګه د سرطان درملنې، نسايي ولادي او ګڼو نورو روغتیايي څانګو کې هېوادوالو ته روغتیايي خدمتونه وړاندې کوي او په نږدې راتلونکي کې به یې د جوړېدو چارې پیل شي بحث او خبرې ترسره شوې.
د عزیزي خیریه بنسټ مسؤلینو د یو پرېزینټېشن په ترڅ کې د یاد روغتون د جوړولو طرحه د عامې روغتیا وزارت له رهبرۍ سره شریکه کړه او د دغه وزارت له رهبرۍ یې د یاد روغتون د منظورۍ غوښتنه وکړه؛ ترڅو له منظورۍ وروسته راتلونکې پروسې چې د دې روغتون د جوړولو لپاره په پلان کې دي پيل شي.
د عامې روغتیا وزارت د روغتیايي خدمتونو د وړاندې کولو مرستیال، ښاغلي مولوي عبدالولي حقاني د دې طرحې د تائید تر څنګ د عزیزي خیریه بنسټ د مسؤلینو څخه د مننې او قدرداني په څرګندولو وویل: ( د عامې روغتیا وزارت رهبري ژمنه ده، چې د نوموړي روغتون د جوړېدو په برخه کې د عزیزي خیریه بنسټ سره هر اړخیزه همکاري وکړي او په دې برخه کې به له هیڅ راز هڅو درېغ ونه کړي.)
