د درملو، روغتیايي او ګیاهي محصولاتو، طبي تجهیزاتو او واکسینونو د فایلونو (اسنادو) ارزونې روزنیز سیمنار دوهم پړاو پیل شو
د درملو او روغتیايي محصولاتو د ثبت او ارزونې ریاست ۲۳ تنو نوي ګمارل شويو کارکوونکو ته د درملو دوسیوو، روغتیايي محصولاتو او ګیاهي محصولاتو، طبي تجهیزاتو او واکسینونو د ارزونې په اړه پنځه ورځني روزنیز پروګرام دوهم پړاو د عامې روغتیا وزارت د خوړو او درملو معینیت په تالار کې پیل شو.
د دې روزنیز پروګرام په لومړۍ ورځ، د درملو او روغتیايي محصولاتو لوی رئیس، ډاکټر نعیم الله ایوبي د درملو او روغتیايي محصولاتو د ثبت په برخه کې ملي او نړیوالو معیارونو ته پاملرنه حیاتي وګڼله، په کاري پروسه کې یې په دقت، چټکتیا او د شفافیت پر اهمیت ټینګار وکړ او له ټولو ګډونوالو یې وغوښتل، چې په دې پروګرام کې فعاله برخه واخلي.
دغه راز، د درملو او روغتیايي محصولاتو د ثبت او ارزونې رئیس، نور احمد حنفي د درملو او روغتیايي محصولاتو د قانوني او باکیفیته واردولو او تولید لپاره د ثبت پروسې پر اهمیت ټینګار وکړ او له ټولو کارکوونکو یې وغوښتل، چې په دې برخه کې فعال رول ولوبوي.
د یادونې وړ ده، چې دا روزنیز پروګرام وړاندې هم د دې ریاست پخوانیو کارکوونکو ته د وړتیا لوړولو په موخه ترسره شوی و.
