د ا.ا.ا د عامې روغتیا وزارت تخنیکي ټیم هند هېواد ته د خپل رسمي سفر په ترڅ کې د یاد هېواد د خوړو او درملو سټنډرډ ادارو له مسؤلینو سره جلا ناستې ترسره کړې
په دې ناستو کې، چې د افغانستان لپاره د هند سفارت سرپرست کرن یادف هم شتون درلود افغانستان ته پر معیاري درملو واردولو، قیمت او کیفیت برخې ته د ځانګړې پاملرنې، افغانستان کې پر پانګونې او ځینو نورو موضوعاتو باندې بحث او خبرې تر سره شوې.
د عامې روغتیا وزارت تخنیکي ټیم هندي پانګه وال وهڅول، چې د افغانستان په داخل کې د درملو د تولید برخه کې کار وکړي او ټینګار یې وکړ، چې افغانستان د نړیوالو معیارونو مطابق، خوندي او باکیفیته درملو ته اړتیا لري ، د درملو د وارداتو برخه کې باید کیفیت، معیاري توب او مناسب قیمت ته ځانګړې پاملرنه وشي.
بل لوري د هند هېواد د خوړو او درملو اتحادیو مسؤلینو د خوړو او درملو د کیفیت او قیمت برخه کې تخنیکي ټیم ته ډاډ ورکړ او زیاته یې کړه، د معیاري درملو د تولید او صادراتو ترڅنګ چمتو دي، چې د درملو په برخه کې تخنیکي همکاري او هم افغانستان کې پانګونه وکړي.
په پای کې دواړو لوریو د روغتیايي همکاریو پر پراختیا، د تجربو پر شریکولو او د دوامدارو اړیکو پر ټینګښت ټینګار وکړ، څو د روغتیايي سکتور د پیاوړتیا لپاره ګډې هڅې لا پراخه شي.
