د کتلوي معافیت ملي پروګرام د درېیمې ربعې فعالیتونو ارزونه ترسره شوه
د کتلوي معافیت ملي پروګرام عمومي مسؤل، ډاکټر عبدالحکیم همت د ۱۴۰۴ کال د درېیمې ربعې د فعالیتونو ارزونې او بیاکتنې په موخه د روغتیا نړیوال سازمان (WHO)، یونیسف (UNICEF) او د روغتیايي خدمتونو وړاندې کوونکو (BPHS) همکارو بنسټونو له استازو سره ناسته ترسره کړه:
په دې ناسته کې د هېواد په ۳۴ ولایتونو کې د واکسیناسیون فعالیتونه او په ۷ زونونو کې د تطبیق کوونکو مؤسسو اجراآت په هر اړخیز ډول وارزول شول. همدارنګه، د اجراآتو مهم شاخصونه، د ټاکل شویو موخو د تحقق کچه، د خدماتو کیفیت، ورته عادلانه لاسرسی او د واکسیناسیون عمومي پوښښ په دقیق ډول وڅېړل شول.
همداراز، د شریکانو ترمنځ د همغږۍ پر ښه والي، د راپور ورکولو سیستم پر پیاوړتیا، په پرېکړو کولو کې د معلوماتو پر اغېزمن استعمال، د ننګونو پر حل او د خدماتو د کیفیت او دوام پر تضمین ټینګار وشو.
د ناستې په پای کې ګډونوالو د دې پروګرام د لا پیاوړتیا او په ټول هېواد کې د واکسیناسیون خدمتونو د دوامداره ښه والي لپاره خپله ژمنتیا څرګنده کړه.
