د افغانستان اسلامي امارت د عامې روغتیا وزیر، ښاغلي ډاکټر قلندر عباد په خپل کاري دفتر کې د ملګرو ملتونو د وګړو صندوق له استازي سره لیدنه ترسره کړه
په دې لیدنه کې د عامې روغتیا وزارت او د دې ادارې ترمنځ د روغتیايي ځالو د معیاري کولو په ځانګړي ډول د ودانیو د رغونې په برخه کې د ګډې همکارۍ، د ګرځنده روغتیايي ټیمونو د پیاوړتیا، لا زیاتې همغږۍ، د روغتیايي برخو د تخنیکي ملاتړ او ګڼو نورو موضوعاتو په اړه بحث او خبرې ترسره شوې.
د عامې روغتیا وزیر، هېوادوالو ته د معیاري روغتیايي خدمتونو وړاندې کول د خپلو لومړیتوبونو څخه وګاڼه او یې ویل، موږ به هڅه وکړو؛ تر څو د روغتیا په برخه کې د خپلو کاري شریکانو په همکارۍ د روغتیايي خدمتونو کیفیت ښه او هېوادوالو ته غوره روغتیايي خدمتونه وړاندې کړو.
له بل لوري د ملګرو ملتونو د وګړو صندوق استازي، د روغتیا په برخه کې د خپلو همکاریو پر دوام ټینګار وکړ او و یې ویل، موږ امکاناتو ته په پام سره له عامې روغتیا وزارت سره همکارۍ ته دوام ورکوو.
