هلمند ولایت کې دوه موټره قاچاقي درمل ونیول شول
دوه موټره درمل چې غوښتل یې له قاچاقي لارې هېواد ته داخل شي، د هلمند ولایت د امنیه قومندانۍ د جرمونو د څار آمریت له لوري په مارجه ولسوالۍ کې ونیول شول.
یاد درمل د هلمند د عامې روغتیا رئیس، مولوي فضلي احمد شفیع الله او د یاد ریاست د یو شمېر نورو مسؤلینو په لارښوونه د عامې روغتیا ریاست مرکزي ګدام ته ولېږدول شول.
دغه نیول شوی درمل چې ۶۳ قلمه او مجموعي اندازه یې ۴۶۷ کارتنه کېږي، ډېر ژر به د ټاکل شوي هیئت په شتون کې له منځه ولاړ شي.
د هلمند د عامې روغتیا ریاست د عمده درمل پلورنځیو ټولو مسؤلینو ته سپارښتنه وکړه، چې په قاچاقي لارو د درملو له واردولو څخه ډډه وکړي، چې د سرغړونې په صورت کې به یې درمل ضبط او له منځه ولاړ شي او سرغړونکي به عدلي او قضایي ارګانونو ته وروپېژندل شي.
