د پولیو له منځه وړلو پروګرام د مشرتابه غړو اوونیزه ناسته ترسره شوه
یاده ناسته د پولیو له منځه وړلو ملي بېړني عملیاتي مرکز رئیس، الحاج ډاکټر عبدالقدوس بریالي په مشرۍ ترسره شوه، چې په کې د پولیو واکسین کمپاین د پوښښ زیاتولو په موخه له درې ورځو څخه څلورو ورځو ته د یاد کمپاین غځولو او په کابل کې د پولیو پروګرام راتلونکې تخنیکي مشورتي غونډې او ستراتېژیکو بحثونو د ناستې چمتووالي اړوند بحث او خبرې ترسره شوې.
په دې ناسته کې د پولیو پروګرام عملیاتي کاري ګروپ ته دنده وسپارل شوه، چې د پولیو واکسین په کمپاین کې د څلورمې ورځې زیاتولو په تړاو عملي وړاندیزونه چمتو کړي؛ ترڅو د یاد کمپاین پوښښ لا زیات شي.
