د عامې روغتیا وزارت اکمال تخصص عمومي ریاست د ټریني ډاکټرانو لپاره د څېړنې (ریسرچ) میتودونو او څرنګوالي په موخه شپږ ورځنی روزنیز پروګرام پیل کړ
د یاد پروګرام موخه د څیړنې (ریسرچ) میتودونه، روغتیايي اصطلاحاتو اساسي مفاهیم، د موضوع په اړه د مونوګرافونو او تیزسونو لیکل او د ټریني ډاکټرانو لپاره د تخصص پروګرام په ګډون د نورو مهمو روغتیايي موضوعاتو ښودل دي.
په یاده غونډه کې د عامې روغتیا وزارت مالي او اداري چارو مرستیال ښاغلي مولوي بخت الرحمن شرافت، د اکمال تخصص عمومي رئیس ډاکټر نثار احمد نیازي، د تخصص برنامې استادانو، ټریني متخصصینو او د مرکزي روغتونونو ډاکټرانو ګډون کړی و.
د مالي او اداري چارو مرستیال وویل: د ورته روزنیزو پروګرامونو ترسره کول د تخصصي پروګرام د ظرفیت لوړولو او څېړنې یا (ریسرچ) میتودونو لپاره اړین وباله او د غونډې له ګډونوالو یې وغوښتل، چې له دې فرصت څخه په بشپړه توګه ګټه واخلي.
ښاغلي مرستیال، د یوې ټولنې او انسانانو پرمختګ د دوی په څېړنو او هڅو کې وباله او ټینګار یې وکړ چې موږ باید هڅه وکړو؛ ترڅو خپل روغتیايي سیستم له نړیوالو معیارونو سره سم چمتو کړو.
د یادونې وړ ده چې یاد روزنیز پروګرام به نه یوازې په مرکز کې د ټریني ډاکټرانو لپاره وي، بلکی د هېواد په نورو ولایتونو کې به هم دوام وکړي.
