د روغتیایي خدمتونو وړاندې کولو مرستیال په ننګرهار سیمه ییز روغتون کې د یو شمیر جوړیدونکو برخو څخه لیدنه وکړه
د ا.ا.ا. د عامې روغتیا وزارت روغتیايي خدمتونو وړاندې کولو مرستیال، ښاغلي مولوي عبدالولي حقاني او مل پلاوي ننګرهار ته د سفر پر مهال دې ولایت کې د سرطاني ناروغیو درملنې نوي جوړېدونکي ۵۰ بستریز روغتون او په سیمه ییز روغتون کې د یو شمېر جوړېدونکو برخو له چارو لیدنه وکړه.
په یاده لیدنه کې چې د روغتیا وزارت مرکزي رئیسانو، د ننګرهار عامې روغتیا رئیس مولوي امین الله شریف او یو شمېر نورو مسئولینو ګډون کړی و، ښاغلي مرستیال د سرطاني ناروغیو ۵۰ بستریز او سیمه ییز روغتون بېلا بېلې برخې له نږدې ولیدې، په روغتونونو کې یې په نویو رامنځته شويو پرمختګونو خوښي څرګنده، مسئولینو ته یې د غوره روغتیايي خدمتونو وړاندې کېدو په موخه سپارښتنې ترسره او د خدماتو لا ښه والي په موخه یې د یو شمېر همکاریو ډاډ څرګند کړ.
ښاغلي مرستیال دغه راز، د بي بي فاطمةالزهرا ولایتي روغتون له خدمتونو هم لیدنه وکړه او اړوندو مسؤلینو ته یې سپارښتنې وکړې، چې د ناروغانو ستونزو ته په وخت رسېدنه ترسره او د درملنې برخه کې یې له هېڅ ډول هڅو درېغ ونه کړي.
