د روغتیايي خدمتونو ارزونې په موخه تورخم ته د عامې روغتیا وزیر سفر
د ا.ا.ا. د عامې روغتیا وزیر، ښاغلي مولوي نور جلال جلالي او مل پلاوي ننګرهار ته د سفر پر مهال تورخم کې بېرته راستنېدونکو هېوادوالو ته د وړاندې کېدونکو روغتیايي خدمتونو ارزونه وکړه
په دې ارزونه کې د عامې روغتیا وزارت د مقام د دفتر لوی رئیس شیخ محمد طاهر حلیم، د ننګرهار عامې روغتیا رئیس مولوي آمین الله شریف، د وزارت مرکزي رئیسانو او روغتیاپالانو هم ګډون کړی و.
د عامې روغتیا وزیر، په تورخم کې د جوړو شویو بېلا بېلو روغتیايي مرکزونو له فعالیتونو ارزونه ترسره، د راستېدونکو ناروغانو احوال یې واخیست، د روغتیايي کارکوونکو او مسئولینو د ترسره کړو فعالیتونو ستاینه یې وکړه او د لا غوره خدمتونو وړاندې کولو په موخه یې ورته اړینې سپارښتنې وکړې.
ښاغلي وزیر همداراز، تورخم کې راستنېدونکو هېوادوالو ته د روغتیايي خدمتونو پر کیفیت لوړولو، تجهیزاتو برابرولو، درملو او نورو برخو ته په ځانګړې پاملرنې ټینګار وکړ او ژمنه یې وکړه، چې د عامې روغتیا وزارت به د تورخم په عمري مېشت غالي کې د روغتیايي خدمتونو پراختیا ته دوام ورکوي.
