د عامې روغتیا وزارت د عامه تغذیې ریاست له لوري په روغتونونو کې د تغذیې متخصصینو او ډاکټرانو د ظرفیت لوړولو په موخه په "روغتونونو کې د شدیدې حاد خوارځواکۍ مدیریت" تر عنوان لاندې شپږ ورځنی روزنیز ټریننګ پیل شو
دا روزنیز پروګرام د هغو متخصصینو او ډاکټرانو لپاره تر سره کېږي، چې د روغتونونو د خوارځواکۍ واحدونو (TFU) کې کار کوي او موخه یې د دوی ظرفیت لوړول دي.
په دې روزنیز ټریننګ کې د مرکز کابل او پنجشیر، پکتیکا، غزني، کاپیسا او میدان وردګ ولایتونو څخه ۳۰ تنه متخصصین ګډون لري.
د عامې روغتیا وزارت د عامه تغذیې رئیس، ډاکټر حکمت الله معصومي د دې ټریننګ د پرانیستې په مراسمو کې د ورته روزنیزو پروګرامونو د ترسره کولو د اهمیت په اړه خبرې وکړې او زیاته یې کړه، په روغتونونو کې د تغذیې برخې کارکوونکو ظرفیت لوړول د خوارځواکۍ ښې درملنې او ناروغانو ته د غوره خدماتو وړاندې کولو کې مهم رول لوبوي.
د یادونې وړ ده، چې د دې شپږ ورځني روزنیز ټریننګ په ترڅ کې به ګډونوالو ته د خوارځواکۍ درملنه، د داخل بستر ناروغانو پاملرنه، د TFU واحد مدیریت، د خوړو کیفیت کنټرول او د راپور ورکولو سیسټمونه په نظري او عملي توګه تدریس شي.
