د پولیو له منځه وړلو ملي بېړني عملیاتي مرکز رئیس، ډاکټر عبدالقدوس بریالي کندهار ولایت ته سفر ترسره کړ
د یاد سفر په ترڅ کې ډاکټر عبدالقدوس بریالي د کلسټرونو څارونکو او ولسوالیو همغږي کوونکو د روزنیزو غونډو پرانیسته او څارنه وکړه، چې په لړ کې یې د کندهار ښار، ژړۍ، میوند، ارغنداب، معروف، غورک، تختهپل، سپین بولدک او میانشین ولسوالیو روزنیزې غونډې شاملې دي
د دغو روزنیزو غونډو موخه د سیمهییزو څارونکو او همغږي کوونکو د ظرفیتونو لوړول دي؛ تر څو زده شوي مهارتونه د لومړۍ کرښې کارکوونکو سره شریک کړي؛ چې دا کار د پولیو واکسین پروګرام د اغېز او کیفیت لوړولو لپاره ترسره کېږي.
ډاکټر بریالي له یادو روزنیزو غونډو څخه د څارنې پر مهال وویل: «څومره چې موږ د لومړۍ کرښې د کارکوونکو وړتیاوې لوړوو، هومره کولای شو د پولیو واکسین پروګرام کیفیت ښه کړو».
