له ۴۱ کسانو څخه چې خپلې مسلکي زده کړې یې له هېواده بهر کړې وې ازموینه واخیستل شوه
د عامې روغتیا وزارت د کارکوونکو چارو لوی ریاست په همکارۍ د خصوصي روغتیایي علومو انسټیټیوټونو ریاست له هغه ۴۱ داوطلبانو څخه، چې بهر کې یې زده کړې کړې وې ازموینه واخیستله.
د عامې روغتیا وزارت د خصوصي روغتیایي علومو انسټیټیوټونو رئیس، مولوي ګلاب راشد وویل: دا ازموینه د نرسنګ، قابلګۍ، فارمسي، راډیولوژي، انستیزي، لابراتوار، د غاښونو پروتېز او فزیوتراپي برخو کې له ګډونوالو څخه واخیستل شوه.
د خصوصي روغتیایي علومو انسټیټیوټونو رئیس زیاته کړه، چې د دغې ازموینې لپاره د هرې څانګې اړوند ۵۰ څلور ځوابه پوښتنې ټاکل شوې وې او د حل لپاره یې یو ساعت وخت ورکړل شوی دی.
د یادونې وړ ده، چې د یادې ازموینې پایلې به په راتلونکې یوه اوونۍ کې د عامې روغتیا وزارت له رسمي ادرسونو څخه اعلان شي.
