د بغلان ولایت په مرکزي بغلان سل بستریز روغتون کې د ۵۰ زره ډالرو په لګښت د نویو زیږېدلو ماشومانو لپاره د جدي پاملرنې څانګه پرانیستل شوه
په همدې موخه جوړو شویو مراسمو کې د بغلان عامې روغتیا رییس، ډاکټر عبدالقهار احمدي وویل: ( د بغلان عامې روغتیا ریاست په همغږۍ او د اغاخان بنسټ په مالي همکارۍ د مرکزي بغلان په سل بستریز روغتون کې د نویو زېږېدلو ماشومانو لپاره دغه معیاري څانګه د ټولو طبي وسایلو په درلودلو سره فعاله شوه، چې د ولایت په کچه به په کې د نویو زیږېدلو ماشومانو درملنه کېږي).
نوموړي دغه راز زیاته کړه، د یاد بنسټ په مالي همکارۍ د دغه ولایت نهرین ولسوالۍ په ۳۵ بستریز روغتون کې د جراحي عملیاتو معیاري څانګه هم په اساسي ډول فعاله او په اړینو طبي وسایلو سمبال شوه، چې د ګڼو ناروغانو روغتیايي ستونزې به ورسره حل شي.
