د عامې روغتیا وزارت د غونډو په تالار کې د خوراکي توکو، درملو او روغتیايي محصولاتو د قاچاق مخنیوي قانون د لا ښه تطبیق په موخه د همغږۍ درېیمه غونډه ترسره شوه
دا غونډه چې د عامې روغتیا وزیر، ښاغلي مولوي نور جلال جلالي په مشرۍ ، د خوړو او درملو مرستیال ښاغلي مولوي حمدالله زاهد، د مالیې وزارت، ملي دفاع وزارت، کورنیو چارو وزارت، صنعت او سوداګرۍ وزارت، کرنې، اوبو لګولو او مالدارۍ وزارت، اطلاعاتو او کلتور وزارت، د چارو ادارې لوی ریاست، استخباراتو لوی ریاست، کابل ښاروالۍ ریاست، د معیار او کیفیت ملي ادارې او سترې محکمې د استازو په شتون کې ترسره شوه ، د یادو وزارتونو او ملي ادارو له استازو څخه جوړې شوې کمېټې د قاچاق مخنیوي قانون، چې د عاليقدر امیرالمؤمنین حفظهالله د ۲۴ مې ګڼې فرمان له مخې توشیح شوی، د لا غوره تطبیق په اړه خپل نظرونه او وړاندیزونه شریک کړل، تر څو یاد قانون په اغېزمن او شفاف ډول پلی شي.
د عامې روغتیا وزیر، ښاغلي مولوي نور جلال جلالي د قاچاق مخنیوي قانون پر جدي او لازم تطبیق ټینګار وکړ او ویې ویل، په سرحدونو کې باید د ناقانونه درملو او خوړو د وارېدولو مخه ونیول شي نوموړي همدارنګه د بین الوزارتي کمیټې له غړو د هر اړخیزې همکارۍ مننه وکړه او د شته ستونزو د حل په موخه یې د لا همغږۍ او چارو د سرعت غوښتنه وکړه.
