د عامې روغتیا وزارت له لوري د زړه ناروغیو په اړه د عامه پوهاوي غونډه ترسره شوه
په دې غونډه کې د عامې روغتیا وزارت د روغتیایي خدمتونو وړاندې کولو مرستیال ښاغلي مولوي عبدالولي حقاني، د وزارت مرکزي رئیسانو، د روغتیا نړیوال سازمان او رسنیو استازو ګډون کړی و، چې په کې د زړه ناروغیو د کنټرول او مخنیوي په اړه هر اړخېزې ویناوې ترسره شوې.
د عامې روغتیا وزارت د روغتیایي خدمتونو وړاندې کولو مرستیال، ښاغلي مولوي عبدالولي حقاني د زړه ناروغیو د کنټرول او مخنیوي لپاره سالم عادتونه، د طبي خوړو استعمال او له نشه یي توکو څخه ډډه کول، اړین وبلل او ویې ویل: ( عامې روغتیا وزارت د هېواد په کچه د زړه ناروغیو د کنټرول او مخنیوي لپاره دوامداره هڅې کوي، چې په دې برخه کې د عامه پوهاوي پروګرامونه هم شامل دي).
همداراز، د عامې روغتیا وزارت د مقام د دفتر لوی رئیس، شیخ محمد طاهر حلیم د اسلام مبارک دین له نظره د زړه د ارزښت او اهمیت په اړه هر اړخېزه وینا تر سره او ګډونوالو ته یې د زړه سالم ساتلو اړوند معلومات ورکړل.
دغه راز، د عامې روغتیا وزارت د ناروغیو د کنټرول او مخنیوي لوی رئیس، ډاکټر حیدر خان حیدر وویل، د زړه د اتیا سلنه ناروغیو کنټرول او مخنیوی د وقایې له لارې کېږي؛ نو په همدې اساس باید د خوراکي توکو استعمال کې احتیاط وشي، د زیاتې مالګې، بورې او غوړو له کارولو څخه ډډه وشي.
بل لور، د روغتیا نړیوال سازمان استازي، ډاکټر عبدالوهاب هم د زړه ناروغیو د مخنیوي په اړه وینا ترسره او په نړیواله کچه یې غیري ساري ناروغۍ اوس هم د مړینو اصلي علتونه وبلل او زیاته یې کړه، چې د زړه ناروغیو له امله هر کال په نړیواله کچه ۱۸ میلیونه انسانان خپل ژوند له لاسه ورکوي، چې د دې کچې د راټیټولو لپاره باید د عامه پوهاوي پروګرامونه لا زیات شي.
