د روغتیايي خدمتونو د وړاندې کولو مرستیال تعقیبي ناسته ترسره کړه
د عامې روغتیا وزارت د روغتیايي خدمتونو د وړاندې کولو مرستیال، ښاغلي مولوي عبدالولي حقاني په خپل کاري دفتر کې د دې وزارت اړوند، مرکزي ریاستونو له رئیسانو سره د ستونزو د حل او د روغتیايي سیستم د پیاوړتیا په موخه تعقیبي ناسته ترسره کړه
په دې ناسته کې د عامې روغتیا وزارت د معالجوي طب، وقایوي طب، تخصصي او ثالثي روغتونونو او مالي ریاستونو مسؤلینو شتون درلود، چې هېوادوالو ته د غوره روغتیايي خدمتونو په وړاندې کېدو، د ناروغانو روغتیايي ستونزو ته پر وخت رسېدنې او د ریاستونو تر منځ په غوره او دومداره همغږۍ اړوند په کې بحث او خبرې ترسره شوې.
د عامې روغتیا وزارت د روغتیايي خدمتونو د وړاندې کولو مرستیال، ښاغلي مولوي عبدالولي حقاني په مساوي توګه د هېواد ټولو وګړو ته پر وخت د غوره روغتیايي خدمتونو رسولو ټینګار ته په اشارې وویل، د عامې روغتیا وزارت په هڅه کې دی، چې د روغتیا په برخه کې موجوده ستونزې حل او د خپلو کاري همکارانو سره په ګډه روغتیايي سیستم پیاوړی کړي؛ ترڅو ټولو هېوادوالو ته په کور دننه معیاري روغتیايي خدمتونه وړاندې کړي.
د عامې روغتیا وزارت د روغتیایي خدمتونو د وړاندې کولو مرستیال همداراز د یادو ریاستونو له مسؤلینو وغوښتل؛ ترڅو د روغتیايي سیستم د پیاوړتیا او د هېوادوالو روغتیايي ستونزو د حل او درملنې په موخه په رېښتیني توګه خپلې دندې ترسره کړي.
