دعامې روغتیاوزارت مالي او اداري معین، ښاغلي مولوي محمداسحق صاحبزاده له لوري دنورستان ولایتي ۱۰۰ بستریزروغتون دکتلوي معافیت د ودانۍ او د پنځلسو کورنیو روغتیايي ځالوپرانیسته ترسره شوه
د عامې روغتیا وزارت مالي او اداري معین، ښاغلي مولوي محمد اسحق صاحبزاده له لوري د نورستان ولایتي ۱۰۰ بستریز روغتون د کتلوي معافیت د ودانۍ او د پنځلسو کورنیو روغتیايي ځالو (FHH) پرانیسته ترسره شوه
په همدې موخه جوړو شوو مراسمو کې د عامې روغتیا وزارت مالي او اداري معین، مولوي محمد اسحق صاحبزاده د نورستان مرستیال والي، مولوي فیصل مختار، روغتیايي مسئولینو د تطبیق کوونکو موسسئو استازو او روغتیايي کارکوونکو ګډون کړی و.
مالي او اداري معین، مولوي محمد اسحق صاحبزاده د یادو روغتیايي پروژو پرانیسته په روغتیايي سکتور کې یوه ستره لاسته راوړنه وبلله او ویې ویل: اسلامي امارت دې برخې ته پوره پاملرنه کړې، هغه سیمې چې په تېر کې له روغتیايي خدماتو محرومې وې، اسلامي امارت ورته معیاري، عادلانه روغتیايي خدمات وړاندې کوي او روغتیايي خدمات به د هېواد فرد، فرد ته رسېږي.
همدارنګه د نورستان ولایتي روغتون ته له ۵۰ بسترونو څخه ۱۰۰ بسترونو ته ارتقاء ورکړل شوه چې د دې ولایت د ناروغانو د درملنې په برخه کې به ګټور ثابت شي.
همداراز د نورستان ولایت د کتلوي معافیت ودانۍ په عصري او مجهزو وسایلو سمباله ده او د لس ډوله واکسینونو د ساتلو وړتیا لري او د ۱۲،۵ مېلیونه افغانیو په لګښت د یونیسف ادارې په مالي ملاتړ پرانیستل شوه.
او تر څنګ يې په یاد ولایت کې ۱۵ کورنۍ روغتیايي ځالې (FHH) چې اته خونې لري او د مور او ماشوم لپاره به روغتیايي خدمات وړاندې کېږي، پرانیستل شوې او پر لس نورو روغتیايي ځالو عملا کار روان دی چې په نیږدې راتلونکې کې به پرانیستل شي.
