د هلمند ولایت سنګین ولسوالۍ کې ۷ ټنه له نېټې تېر خوراکي توکي او مشروبات له منځه یووړل شول
یاد خوراکي توکي او مشروبات د سنګین ولسوالۍ له بازار څخه د اړوندو ادارو مسؤلینو د ګډې کمېټې له لوري راټول شوي وو او د یو شمېر مسؤلینو په شتون کې له منځه یووړل شول.
د عامې روغتیا ریاست مسؤلینو عمده پلورونکو او د خوراکي تاسیساتو مسؤلینو ته وویل، ټول تولیدات او وارداتي توکي یوازې د رسمي جواز تر ترلاسه کولو او د باوري لابراتوار له لوري د کیفیت تر معاینې وروسته بازار ته وړاندې کړئ؛ څو هېوادوالو ته معیاري، باکیفیته او خوندي توکي ورسېږي او خلک له احتمالي ناروغیو څخه وژغورل شي او ټینګار یې وکړ، که هر څوک له روغتیایي قوانینو څخه سرغړونه وکړي، له قانوني چلند ترسره به مخ شي.
